Shoku i zëvendëskryeministrit Besnik Bislimi, sot është emëruar anëtar në Bordin e Kompanisë Rajonale të Ujitjes ‘Drini i Bardhë’. Ish-këshilltari i kryeministrit Kurti, Milot Cacaj, është emëruar zëvendësguvernator në Bankën Qendrore të Kosovës.
Qeveria e Kosovës ka emëruar të mërkurën anëtarët e Bordit të Kompanisë Rajonale të Ujitjes “Drini i Bardhë“.
Pjesë e këtij bordit është edhe Ilaz Halili, anëtar i bordit të KRU “Drini i Bardhë”. Halili ka qenë anëtar i bordit të përkohshëm të kësaj ndërmarrjeje, deri në zgjedhjen e bordit të ri.
Ai është dosti i zëvendëskryeministrit, Besnik Bislimi, me të cilin kanë qenë një shkollë me të.
Insajderi së fundmi ka raportuar për avancimin e tij në Telekomin e Kosovës.
Halili është avancuar në pozitën e menaxherit Menaxher Departamenti – Sigurimi i te hyrave, ndonëse s’ka pasur pozitë të mëhershme menaxheriale.
Pjesë tjetër e bordit të KRU “Drini i Bardhë” janë si vijojnë: Arjeta Zeka – kryesuese, Shkodran Gaxherri – anëtar, Zamire Deçani-Beqiri – anëtare, Rina Sylafeta-Kumnova – anëtare dhe Besim Kajabegolli – anëtar
Ndërkohë, sot u bë e ditur se Milot Cakaj është emëruar zëvendësguvernator në Bankën Qendrore të Kosovës.
Pasi kishte ardhur në pushtet, kryeministri Albin Kurti e kishte angazhuar Cakajn në kabinetin e tij, duke e emëruar si këshilltar politik më 20 mars të vitit 2020.
BQK-ja njoftoi sot se pas një mbledhjeje, Cakaj u emërua si zëvendës i guvernatorit, së bashku me Neserin Shilekun. Ata, siç njoftoi BQK, “do të jenë përgjegjës primar për fushën e Mbikëqyrjes Financiare, Praktikat e Tregut, Rishqyrtimin dhe Shërbimet e Përgjithshme”.
BQK tha se “përzgjedhja është bërë sipas kërkesave të Ligjit të BQK-së përmes një procesi konkurrues dhe meritor, me propozim të Guvernatorit”.
Me përfundimin e këtij procesi, BQK tha se tashmë janë plotësuar të gjitha strukturat vendimmarrëse të BQK-së të përcaktuara në Ligjin e BQK-së dhe Strukturën Organizative.