Kryetari i “Demokratëve për Drenasin”, Driton Ajazi, ka përkujtuar sot njërën nga betejat më të lavdishme të Ushtrisë Çlirimtare të Kosovës, atë të 18 prillit 1999, të njohur si Beteja e Gurit të Gradinës.
Në këtë përvjetor të rëndësishëm, Ajazi ka nderuar dëshmorët që ranë heroikisht në mbrojtje të mbi 100 mijë civilëve të strehuar në bjeshkët e Berishës, duke theksuar se jeta dhe vdekja atë ditë ndaheshin vetëm nga një fije fati.
“Në atë betejë heroike u përjetësuan në altarin e lirisë dëshmorët: Halim Bajraktari, Mentor Morina, Islam Kastrati, Ramadan Bytyqi, Muhamet Gashi dhe Mentor Gashi,” theksoi Ajazi në mesazhin e tij përkujtimor.
Ai përmendi gjithashtu edhe dëshmorët Azem Hajdari dhe Mehdi Fazliu, të cilët u flijuan po në të njëjtën ditë, por në vende të ndryshme.
Në mënyrë të veçantë, Ajazi përkujtoi edhe dajën e tij, dëshmorin Mentor Gashi, i cili ishte vetëm 16 vjeç kur dha jetën për lirinë e Kosovës. “Ai e mposhti frikën, sepse besimi në liri ishte më i madh se çdo ndjenjë tjetër. Ai nuk jetoi për të parë lirinë, por falë tij dhe bashkëluftëtarëve të tij, ne sot e shijojmë atë,” tha Ajazi.
Postimi i plotë:
