Gazeta Sinjali tash e disa ditë ka raportuar në mënyrë të vazhdueshme për një rast të dhunës në familje, pasi një burrë i cili jeton dhe vepron në Zvicër, dyshohet se ka kërcënuar partneren e tij në Kosovë. Kjo e fundit ka denoncuar rastin në Polici dhe si rrjedhojë, i dyshuari posa ka arritur në Merdar është arrestuar dhe ka përfunduar në ndalim policor.
Burimet e Gazetës Sinjali brenda Prokurorisë kanë bërë me dije se bëhet fjalë për Avni Krasniqi, 40-vjeçar.
Krasniqi u arrestua të shtunën e 11 marsit në pikën kufitare në Merdar dhe i njëjti ishte shoqëruar në stacion policor për t’u intervistuar në cilësinë e të dyshuarit pas denoncimit nga partnerja e tij.
Prokurori i Shtetit kishte urdhëruar që ai të dërgohet në mbajtje dhe të hetohet nën dyshimet për kryerjen e veprës penale ‘Dhunë në familje’.
40-vjeçari me vendim të prokurorit ishte liruar dy ditë më vonë, por që i njëjti gjatë ditës së djeshme sërish është arrestuar dhe është dërguar në mbajtje.
Si ka ndodhur rasti?
Burimet nga Prokuroria kanë bërë me dije se 32-vjeçarja ka deklaruar se personi me të cilin ka bashkëjetuar, pas një konflikti verbal mes tyre, e ka kërcënuar nga Zvicra përmes mesazheve të ndryshme.
Për të mos mbaruar me kaq, ai ka vazhduar me thirrje, duke e kanosur seriozisht, për çka viktima ka vendosur që ta denoncojë rastin, para se të ndodhë diçka më e madhe.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.