Në dhjetor të vitit 2022, dy raste të kanosjes kishin ndodhur në drejtim të deputetëve të Kuvendit të Kosovës, Ganimete Musliut nga radhët e PDK-së dhe Avdullah Hotit të LDK-së, nga persona të ndryshëm, një mërgimtar nga Zvicra dhe tjetri nga Gjermania, shkruan Reporteri.net. Një vit e gjysmë pas, brenda 24 orësh, Gjykata Themelore e Prishtinës i ka dënuar të dy të dyshuarit – mërgimtarë, njëri nga Zvicra e tjetri nga Gjermania.
Mërgimtari nga Zvicra, përmes telefonit e kishte kërcënuar deputeten Musliu, e që i njëjti gjatë ditës së djeshme është dënuar nga Gjykata Themelore në Prishtinë.
Sipas aktakuzës, me datë 23 dhjetor 2022 rreth orës 17:16, derisa Musliu ishte në veturën e saj në lagjen e “Spitalit” në Prishtinë, i akuzuari Driton Maloku përmes telefonit mobil e kanos të dëmtuarën Ganimete Musliu në cilësinë e deputetes së Kuvendit të Kosovës me fjalë “A je ti Ganimetja, ty duhet me te zhduk” e pas disa minutash rreth orës 17:35 i dërgon një mesazh përmes telefonit mobil me tekstin “Përshëndetje Ganimete, Aje tu ma kry qat pun me shti qat personin ne pun per qka je pagu a po i kthen qato 20,000.00 euro qe mi ke mar për me kry pun”, me çka tek e dëmtuara Ganimete Musliu ka shkaktuar ndjenjën e frikës, ankthit dhe pasigurisë për jetën dhe trupin e sajë.
Maloku, dje nga Gjykata Themelore në Prishtinë u dënua me 6 muaj burgim, të cilën mund ta zëvendësojë në dënim me gjobë në shumën prej 5 mijë euro, me pëlqim të të akuzuarit, mirëpo deputetja e PDK-së e vlerësoi si dënim të ulët, ndërsa paralajmëroi se do të ndërmarrë veprime tjera të nevojshme për ta kundërshtuar.
“Përndryshe, konsideroj se dënimi ndaj personit që më kanosi, është shumë i ulët dhe do të konsultohem me avokatin tim për të ndërmarrë veprimet e nevojshme për t’a kundërshtuar me ankesë”, kishte shkruar Musliu në Facebook.
E rasti i njëjtë ka ndodhur edhe sot, ku Gjykata Themelore në Prishtinë e dënoi me 4 muaj burgim, ose zëvendësim të dënimit me 2 mijë euro gjobë me pëlqim të të akuzuarit, një mërgimtar nga Gjermania.
Reshat Sadiku nga Gjermania e kishte kërcënuar ish-kryeministrin, njëherit deputetin e LDK-së, Avdullah Hoti në rrjetin social “Facebook”, me fjalët “Ty mor bugar vetëm kosa të vjen hakesh”.
Me të dalë para gjykatës, sot, mërgimtari u afrua pranë deputetit Hoti, duke i thënë se i “gjunjëzohet, por që probleme të tilla s’ka pasur asnjëherë”.
“Kam kontribu shumë, tash më ndodhi kjo. Me të vërtetë gjunjëzohem para jush, se nuk jam njeri i tillë, kurrë në gjyq s’jam kanë as kurrë këso probleme s’kam pas”, tha ai në gjykatë.
“Ndryshe, dënimin më gjobë i akuzuari obligohet që ta paguajë në dy këste në afat prej 15 ditësh pas plotfuqishmërisë së këtij aktgjykimi”, thuhet në njoftimin e Gjykatës.
Por, një gjykim shumë shpejt pritet të zhvillohet pikërisht për kërcënimet në rrjete sociale, pasi Prokuroria Themelore në Prishtinë, më 28 korrik të këtij viti ka ngritur aktakuzë ndaj një personi i cili kishte kanosur deputeten e PDK-së, Ariana Musliu-Shoshi përmes rrjetit sociale Facebook.
Sipas aktakuzës, i pandehuri i lartcekur, më 02.05.2023, rreth orës 19:00, përmes rrjetit social “facebook”, me dashje dhe me qëllim të frikësimit e ka kanosur seriozisht të dëmtuarën A.M-SH., deputete e Kuvendit të Kosovës, për shkak të detyrës së saj, ashtu që i pandehuri nga një profil në rrjetin social “facebook” i drejtohet: “…sa te vije ne pushim… edhe dy muj i ke jete midis Prishtinës ka met masakrue…”, ku me këtë rast tek e dëmtuara është shfaqur ndjenja e frikës, ankthit dhe e pasigurisë për jetën, andaj me këtë i pandehuri ka kryer veprën penale të kanosjes.
Prokurori i Shtetit me rastin e ngritjes së aktakuzës i kishte propozuar Gjykatës që të pandehurit t’i caktohet masa e paraburgimit dhe i njëjti të shpallet fajtor dhe të dënohet sipas ligjit për veprën penale e cila i vihet në barrë.