Ka luajtur tek skuadra kroate, Kujtim Shala: Jam me Dinamo Zagrebin, por e respektoj Ballkanin!
Kujtim Shala është një ish futbollist dhe trajner shqiptar nga Kosova me shtetësi kosovare dhe kroate.
Ai shërbeu si trajner i skuadrës kombëtare të futbollit të Kosovës nga shkurti i vitit 2008 deri në vitin 2009, dhe trajner i KF Prishtinës për një sezon në vitin 2006-2007.
Karrierën si lojtar e pati nisur me ekipin Liria të Prizrenit në vitin 1981, por ka luajtur dy vjet me ekipin e Dinamos së Zagrebit, periudhë gjatë së cilës mori shtetësinë e atij vendi dhe luajti një ndeshje miqësore për llogari të kombëtares kroate.
Pikërisht skuadra ku ai luajti për vite, Dinamo Zagreb do të përballet të enjten me kampionin e Kosovës, FC Ballkanin në Conference League. Në lidhje me këtë ndeshje, Kujtim Shala është prononcuar ekskluzivisht për ‘GazetaBlic Sport’.
“Kam një ndjenjë të mirë që do të shohim një ndeshje shumë të mirë futbolli, ku Ballkani do të luajë kundër një ekipi gjigant si Dinamo. Ballkani ka treguar se është kundërshtar mjaft i papërshtatshëm, Dinamo nuk duhet asesi të nënvlerësojë Ballkanin që është në formë të mirë”, tha fillimisht Shala.
Tutje, ai u deklarua për një krahasim të mundshëm mes skuadrës momentale të Dinamos dhe asaj që ishte në kohën e tij, ku tha se një krahasim i tillë nuk mund të bëhet.
“Nuk mund ta krahasosh atë Dinamon e kohës sime me të sotmen, duke u bazuar edhe në Ligën ku kemi luajtur. Skuadra ishte e përbërë nga super asa të mëdhenj, ndeshjet ishin shumë më atraktive se sot“, vazhdoi tutje Shala.
Si një ish futbollist i skuadrës kroate, Kujtim Shala thotë se është në përkrahje të Dinamo Zagrebit, por që e respekton skuadrën kosovare.
“Gjithçka është e mundur në futboll, besoj se do të shohim një lojë të bukur. Ju e dini që unë jam për Dinamon, edhe pse respektoj Ballkanin, le të fitojë futbolli”, përfundoi Shala.