Në një zhvillim të papritur politik në Kuvendin Komunal të Skënderajt, Lista Ideal, ka shprehur ‘besimin’ e saj te Fadil Nura dhe Sami Lushtaku, duke kërkuar nga ta që të shkëpusin bashkëpunimin me kompaninë regjionale “UNITETI” dhe ta marrin vetë në menaxhim çështjen e mbeturinave në komunë, shkruan rajoni.org.
Ky propozim ka shkaktuar reagime të ashpra nga anëtari i Vetëvendosjes në Skenderaj, Bahri Zabeli, i cili ka thënë së kjo parti kundërshton fuqishëm këtë iniciativë. Sipas reagimit të tij, duke marrë parasysh menaxhimin e deritanishëm të pronës publike nga Nura dhe Lushtaku, çdo shtim i përgjegjësive për ta do të shkaktonte vetëm më shumë dëme për komunën.
Zabeli në postimin e tij gjithashtu ka kritikuar qasjen e Listës Ideal, duke e cilësuar si një opozitë që po i jep mbështetje të hapur pushtetit, madje pa e kërkuar pushteti këtë.
“Pse nuk i shpëtuan edhe pronat publike, meqenëse po i besojnë kaq shumë vullnetit të mirë të asamblistëve të PDK-së?”, thuhet në reagimin e Zabeli, duke aluduar se Lista Ideal po vepron në harmoni me pushtetin në vendimet kyçe për komunën.
Gjithashtu, ai ka akuzuar këtë listë për mosveprim ndaj vendimeve të PDK-së për menaxhimin e pronave, duke thënë se nuk kanë bërë asnjë ankesë apo padi në institucionet përkatëse./Rajoni.org/
