Vjedhjet e shumta në biznese po shkaktojnë humbje të mëdha, por edhe pasiguri. Hajnat në shumicën e rasteve nuk kapen, pasi arrijnë të ikin pa u zbuluar. Një rast i ngjashëm ka ndodhur në qendrën tregtare ‘Super Viva’ në Rahovec, raporton Gazeta Sinjali.
Më shumë se 11 mijë euro janë ‘zhdukur’ nga kasaforta e kompanisë dhe kjo u vërejt nga punëtoret që janë përgjegjëse për pjesën financiare.
Burimet e Gazetës Sinjali kanë bërë me dije se lidhur me rastin është shoqëruar në stacion policor menaxherja e pikës, e cila është intervistuar në cilësinë e të dyshuarës.
Bazuar në dëshminë e saj, ajo nuk ka bërë asnjë keqpërdorim me paratë të cilat janë raportuar të vjedhura.
Si rezultat i denoncimit, njësitë policore kanë marrë të gjitha veprimet hetimore që ndihmojnë në zbardhjen e rrethanave të rastit.
Me urdhër të prokurorit, rasti është cilësuar ‘Keqpërdorim i besimit’, ndërsa veprimet tjera ligjore do merren varësisht nga zhvillimi i hetimeve.