Sot në Drenas, partia politike “Bashkimi Demokratik”, në kuadër të konstituivit të saj, formoi edhe Forumin e Gruas, që do të jetë shtyllë e fortë e organizimit të këtij subjekti politik.
Për peshën dhe rëndësinë e këtij forumi, të pranishmëve iu foli prof. dr. Ajvaz Berisha, kryetar, i cili, ndër të tjera tha:
“Bashkimi Demokratik”, si forcë e re demokratike, me krenari dhe përkushtim po themelon Forumin e Gruas, që përbën një hap të rëndësishëm drejt barazisë, pjesëmarrjes dhe fuqizimit të grave në politikë dhe në shoqëri.
Gratë gjithmonë kanë qenë shtylla e familjes, e shoqërisë dhe e kombit, kurse kontributi i tyre është i pazëvendësueshëm, si në edukim, shëndetësi, ekonomi, ashtu edhe në vendimmarrje dhe politikë. Meqë zëri i tyre nuk është dëgjuar sa dhe si duhet, me formimin e këtij forumi ne po e ndryshojmë këtë realitet! “Ne po i hapim dyert dhe po krijojmë hapësirën e nevojshme që gratë të marrin rolin që u takon me të drejtë,” tha ndër të tjera kryetari Berisha.
Prandaj, Forumi i Gruas do të jetë jo vetëm një mekanizëm për të fuqizuar gratë në politikë, por edhe një zë i fuqishëm për të adresuar sfidat dhe për të promovuar të drejtat e tyre në çdo nivel të shoqërisë.
“Le të punojmë së bashku për të ndërtuar një të ardhme më të mirë,” pohoi Berisha, “ku gratë janë jo vetëm pjesëmarrëse, por edhe lidere në çdo fushë të jetës!”
Të pranishmet në këtë takim, udhëheqëse të këtij forumi zgjodhën Erblina Mulaj, absolvente e Fakultetit të Drejtësisë në Prishtinë, kurse nënkryetare Valdete Elshani-Hysenaj. E posa zgjedhura, Erblina Mulaj, duke u shprehur mirënjohëse për besimin e dhënë, iu tha të pranishmëve se do të punojë me përkushtim që gruaja në komunën e Drenasit të ndjehet plotësisht e barabartë në mjedisin ku punon dhe vepron.
