Plot 53 herë deputetët kanë dështuar të arrijnë në konstituimin e Kuvendit të Kosovës. Të shtunën, në seancën e orës 14:00 ligjvënësit nuk arritën në zgjidhje të bllokadës politike. Një tjetër seancë u paralajmërua sonte nga ora 22:00. 101 deputetë ishin të pranishëm në sallë. Përfaqësuesit e PDK-së, LDK-së dhe AAK-së kanë kërkuar kthim në rend të ditës, rrjedhimisht procedimin në votimin për kryeparlamentar dhe jo për komisionin për votim të fshehtë. Atyre u është ndalur fjala nga kryesuesi i seancës, Avni Dehari.
You can skip this ad in 4Advertisement
Për të 53-tën herë deputetët do të mblidhen në përpjekje për ta konstituuar Kuvendin e Kosovës. Do të jetë seanca e fundit sipas afatit 30-ditor që kishte dhënë Gjykata Kushtetuese për konstituim. E pas 27 korrikut, deputetët nuk mund të mblidhen më deri më 8 gusht pasi Kushtetuesja vendosi masë të përkohshme, sipas të cilës ndalohen vendimet dhe veprimet e deputetëve deri më atë datë.
Gjykata Kushtetuese ka konsideruar që nëse nuk vendoset masa e përkohshme ex officio ndaj vendimeve dhe veprimeve të deputetëve pas datës 27 korrik, çdo vendim dhe veprim i ndërmarrë pas kësaj date deri në vendimmarrjen e gjykatës lidhur me kërkesat mund të shkaktojë dëme të pariparueshme për rendin kushtetues të Republikës së Kosovës dhe funksionimin e institucioneve kyçe.
Tutje thuhet se Gjykata vlerëson se ekzistojnë rrethana të interesit publik e që përfshijnë rendin kushtetues të Republikës së Kosovës që ndërlidhen me themelimin e institucioneve shtetërorë pas zgjedhjeve për Kuvend.
“Prandaj, ndalimi i çdo vendimi dhe veprimi nga ana e deputetëve të zgjedhur të Kuvendit të Republikës së Kosovës pas 26 korrikut 2025 është në interes publik, i domosdoshëm për ruajtjen e rendit kushtetues dhe interesin më të mirë të Republikës së Kosovës dhe qytetarëve të saj”, thuhet tutje në vendim.
Nga ana tjetër, presidentja i është drejtuar Gjykatës Kushtetuese me kërkesë për interpretim lidhur me pasojat juridike që mund të lindin në rast se Kuvendi i ri nuk konstituohet brenda afatit të përcaktuar prej 30 ditësh – që zyrtarisht përfundon sot, më 26 korrik.
Deputetët 52 herë nuk janë pajtuar, fillimisht për emrin e propozuar nga Lëvizja Vetëvendosje, si parti fituese e zgjedhjeve të shkurtit, për kryetare të Kuvendit, Albulena Haxhiun. E më pas, partitë që në legjislaturën e kaluar ishin në opozitë kanë kundërshtuar formimin e një komisioni për votim të fshehtë.
Ambasadorët e vendeve të huaja të premten kanë marrë pjesë në seancën konstituive të Kuvendit. Ata janë shprehur të zhgënjyer me politikanët që nuk kanë arritur të gjejnë zgjidhje për zhbllokim.
