Prokuroria Themelore në Ferizaj ka bërë të ditur se ka kërkuar caktimin e masës së paraburgimit ndaj F.L., të dyshuarit për veprën penale “Vrasje e rëndë”.
Sipas Prokurorisë, dyshohet se F.L. e ka privuar viktiminë B.V. nga jeta duke e groposur më pas në mal, me qëllim të zhdukjes së gjurmëve, shkruan Insajderi.
“Sipas Prokurorisë, ekziston dyshimi i bazuar se më datë 23.01.2025, në orët e pasdites, në malet e fshatit Manastirc të komunës së Ferizajt, i pandehuri F.L., në mënyrë mizore dhe për motive ende të panjohura ka privuar nga jeta viktimën B.V., dhe i njëjti më pas e gropos viktimën në një vend në mal, me qëllim të fshehjes dhe zhdukjes së gjurmëve dhe largohet nga vendi i ngjarjes, kurse më datë 05.02.2025 nga disa persona të fshatit Manastirc gjendet trupi i pajetë i viktimës B.V. me të cilën do të kryente veprën penale “Vrasje e rëndë” neni 173 paragrafi 1 nënparagrafi 1.4 të KPRK-së”, thuhet në njoftim.
B.V. ishte lajmëruar në polici si i zhdukur nga familjarët.
Ndaj të dyshuarit është caktuar masa e ndalimit 48-orësh, deri në një vendim të ri të gjykatës.
