Komandanti i FSK-së, Gjenerallejtënant Bashkim Jashari, gjatë vizitës në ShBA, u takua në Pentagon me Gjenerallejtënant Joseph ‘JS’ McGee, që është edhe Drejtor i Strategjisë, Planeve dhe Politikave në Shtabin e Përbashkët të Forcave Amerikane.
Jashari e informoi McGee për arritjet e FSK-së, përfshirë pjesëmarrjen në Defender25, trajnimet me ushtrinë amerikane dhe përgatitje për dislokim në “JRTC”, duke theksuar rëndësinë e arritjes së Kapaciteteve të Plota Operacionale.
“Ndërsa Gjenerallejtënant McGee e përgëzoi FSK-në për progresin, falënderoi për mikpritjen gjatë UF DE25, si dhe konfirmoi mbështetjen e Pentagonit për zhvillimin dhe bashkëpunimin në misione të përbashkëta paqeruajtëse”.
“Në kuadër të kësaj vizite, Gjenerallejtënant Jashari u takua gjithashtu me Shefin e Byrosë së Gardës Kombëtare të SHBA-së, Gjeneral Steven S. Nordhaus, dhe me Komandantin e Gardës Kombëtare të Ajovës në JRTC, Gjeneral Major Steven Osborn”, thuhet në njoftim.
Gjatë takimit me Shefin e Byrosë së Gardës Kombetare të ShBA-së, Jashari prezantoi të arriturat e FSK-së, teksa shprehu mirënjohje për mbështetje në procesin e trajnimeve dhe përgatitjeve për misionin e dislokimit.
