Shefi i grupit të asamblistëve të subjektit IDEAL në Kuvendin Komunal, Naser Bajraktari, ka reaguar ndaj një shkrimi të publikuar nga Lëvizja Vetëvendosje në portalin Rajoni.org, në të cilin pretendohet për një bashkëpunim të mundshëm të grupit IDEAL me pushtetin komunal.
Bajraktari i ka cilësuar këto pretendime si të pavërteta dhe thekson se është pikërisht grupi që ai drejton, që ka kundërshtuar propozimin për rritjen e tarifës së mbeturinave, i cili ishte parashtruar nga pushteti.
“Një fjalë popullore thotë: ‘I kështi të kesh!’ – dhe kjo thënie përshkruan më së miri reagimin tonë ndaj pretendimeve për gjoja bashkëpunimin tonë me Partinë në pushtet. Kjo nuk është aspak e vërtetë; e vërteta është krejtësisht e kundërta,” tha ai në reagimin e tij.
Ai shtoi se, gjatë seancës së fundit të Kuvendit Komunal, Lëvizja Vetëvendosje nuk ka shfaqur qëndrim të kundërt ndaj propozimit të pushtetit për rritjen e tarifës për mbeturina. Sipas tij, falë insistimit të grupit IDEAL, ky propozim nuk ka hyrë në votim dhe është shtyrë për seancën e ardhshme.
“Faktet flasin vetë: ekziston incizimi i seancës, ku duket qartë se kush ishte me kë dhe kush bashkëpunoi me kë. Në atë seancë, Vetëvendosja tha se është pro ngritjes së tarifës”, ka reaguar Bajraktari në emër të IDEAL’it./Rajoni.org/
