Komuna që udhëhiqet nga Zenun Elzaj i AAK’së ka shpallur fitues të tenderit kompaninë “Interlab” SHPK, e cila deri para disa muajsh ishte në Lisën e Zezë të Gjykatës së Tenderëve, për shkak të dokumenteve false që ia ka paraqitur shtetit, shkruan portali rajoni.org.
Në tenderin që parashikohej me vlerë 85 mijë euro, si për qudi kompania që kishte mashtruar shtetin e ka fituar me çmim prej 84 mije e 850 euro, vetëm 150 euro nën çmimin e vlerës së parashikuar, zbulon portali rajoni.org.
Kjo kompani është shpallur fituese e tenderit me titull: Furnizim me paisje mjeksore ne QKMF . Mamografi dhe paisje tjera.
Vendimi për shpalljen fitues të kompnaisë në fjale me bazë në Shtime, e cila udhëhiqet nga Betim Sadriu, e që për veprimtari primare e ka tregtinë me shumicë të produkteve kimike, është marrë me datën 14 nëntor të këtij viti.
Pse “Interlab” SHPK ishte futur në Listë të Zezë nga shteti?
Kompania “Interlab” SHPK ishte futur në Listë të Zezë nga shteti shkurtin e vitit të kaluar.
Kështu pati vendosur Gjykata e Tenderëve, pasi operatori ekonomik që merret me tregtinë e produkteve medicinale ka mashtruar shtetin, duke paraqitur dokumente të falsifikuara.
“Operatori në fjalë diskualifikohet dhe atë për periudhë kohore prej 1 viti, të njëjtit i ndalohet pjesëmarrja në Aktivitetet e Prokurimit Publik të Republikën e Kosovës, nga data 01.02.2021 deri më 31.01.2022”, thuhej në vendimin e OSHP-së.
Ky vendim kishte ardhur pas ankesës së Shërbimit Spitalor Klinik dhe Universitar të Kosovës, të bërë më 18 janar 2021, ku thuhej se “Interlab” SHPK ka paraqitur të dhëna të rreme dhe dokumente të falsifikuara në tenderin: “Furnizimi me material medicinal nga LE për nevojat e ShSKUK-së”.
“Interlab” SHPK në prokurimin publik të SHSKUK-së ka pas konkurruar për Lot 12, pozicioni 2, me “Tongue depressor Wooden” apo shkopinjë sterilë për kontrollimin e fytit, me prodhues “Yangazhou Super Union Kinë”.
Sipas dokumenteve origjinale, prodhuese e 149 mijë shkopinjve sterilë për kontrollimin e fytit (të njohur si depresor) të porositura nga SHSKUK nuk janë prodhura nga “Yangazhou…”, siç ka deklaruar “Interlab”-i, por nga “Boen healthcare Co., Ltd Kina”.
“Interlab” SHPK kishte fituar tender gjatë kohës sa ishte Listë të Zezë
Gazeta Insajderi pati zbuluar vitin e kaluar se “Interlab” SHPK e pati fituar një tender në vlerë prej 25 mijë eurove nga komuna e Vushtrrisë, një muaj pasi e njëjta është futur në Listë të Zezë nga Gjykata e Tenderëve.
Komuna e Vushtrrisë dhe kompania “Interlab” SHPK më 26 mars të 2021 e patën nënshkruar kontratën për një tender që vlente 25 mijë euro.
Kompania do të furnizonte me pajisje mjekësore për Covid-19 qendrat e mjekësisë në Vushtrri.
Njoftimi për dhënien e këtij tenderi ishte bërë më 4 mars 2021, një muaj pasi “Interlab” SHPK ishte futur në Listë të Zezë nga Organi Shqyrtues i Prokurimit, shkruan Gazeta Insajderi.
Drejtori i Prokurimit në Vushtrri, Amir Haradinaj, e pati arsyetuar këtë veprim të komunës. Ai kishte thënë se të gjithë procedurat e prokurimit për këtë tender ishin kryer para se “Interlab” SHPK të futej në Listë të Zezë nga Gjykata e Tenderëve.
“Të gjitha procedurat e prokurimit janë kryer para se kompania të futet në Listë të Zezë nga shteti, por kontrata nuk është nënshkruar deri në mars për shkak se nuk e kemi pasur buxhetin e siguruar”.
“Në momentin që e kemi siguruar buxhetin, e kemi nënshkruar edhe kontratën me “Interlab” SHPK”, kishte thënë Haradinaj për insajderin.
Por, një gjë të tillë nuk e lejon Ligji i Prokurimit. Në momentin që një kompani futet në Listën e Zezë nuk mund të jetë pjesë e procedurave tenderuese.
Komuna e Vushtrrisë njoftimin për dhënie të kontratës dhe nënshkrimin e saj e pati bërë një muaj pas vendimit të OSHP-së për ta futur “Interlab” SHPK në Listë të Zezë .
Ndërkaq, njoftimi për hapjen e këtij tenderi ishte bërë më 4 dhjetor 2020.
Blerim Dina, atë kohë kryetari i Organit Shqyrtues të Prokurimit, pati pohuar se në momentin që një operator diskualifikohet, ai nuk ka të drejt të marrë kontratë publike, pavarësisht nëse për të njëjtën ka aplikuar para se të futej në Listë të Zezë.
“Konform nenit 32 të rregullores se punës të OSHP-së nëse një OE [operator ekonomik] futet në Listë të Zezë, nga momenti i nxjerrjes së vendimit e deri në datën sa zgjat diskualifikimi, diskualifikohet nga procedurat e prokurimit”, thoshte Dina për insajderin.
Neni 32 i rregullores së Organit Shqyrtues të Prokurimit ndër të tjera e ndalon edhe nënshkrimin e kontratës publike me autoritetin kontraktues nga momenti që ajo futet në Listë të Zezë.
“Diskualifikimi është i vlefshëm nga momenti i nxjerrjes së vendimit lidhur me diskualifikimin, deri në periudhën kohore të përcaktuar ne vendimin e panelit shqyrtues. Për qëllime të kësaj dispozite aktiviteti i prokurimit ndër të tjerash përfshinë edhe nënshkrimin e kontratës publike me autoritetin kontraktues”, shpjegon neni 32 i rregullores së Gjykatës së Tenderëve.
“Interlab” SHPK mori mbi 2 milionë euro nga kontratat e negociuar në kohën e
Kompania “Interlab” në pikun e pandemisë së Coronavirusit gjatë vitit 2020, pati përfituar tri kontrata të negociuara nga Ministria e Shëndetësisë, të cilat kapnin shumën e mbi 2 milionë eurove.
MSH këtë kompani e pati shpërblyer me një kontratë të negociuar për 60 mijë teste PCR për Sars-Cov-2, në vlerën e 1 milion e 300 mijë euro.
Një kontratë të negociuar për teste PCR, “Interlab” e kishte fituar edhe në muajin maj. Kontrata ishte në vlerë 157 mijë euro për furnizim të rreth 10 mijë testeve PCR.
Ndërkaq në prill, Ministria e Shëndetësisë kishte blerë nga kjo kompani 30 respiratorë në vlerë 749 mijë euro.