Vajzat e gratë kosovare vazhdojnë të jenë viktimat më të shpeshta të dhunës në familje. Ato vazhdimisht përballen me dhunë psikike, ekonomike e fizike, duke u keqtrajtuar në forma të ndryshme. Fjalori denigrues i burrave ndaj tyre, ofendimet e sharjet të cilat i marrin, në shumë raste i detyrojnë të kërkojnë ndihmën e Policisë, raporton Gazeta Sinjali.
Në Polici kanë përfunduar mbrëmë edhe një çift nga fshati Smrekonicë e Vushtrrisë, ku një person dyshohet se ka ushtruar dhunë psikike ndaj bashkëshortes së saj.
Burimet e Gazetës Sinjali brenda Prokurorisë kanë bërë me dije se 41-vjeçarja ka akuzuar bashkëshortin e saj se e ka sharë e ofenduar me fjalë si ‘k*rvë, rrospi e hajneshë’.
Si rezultat i denoncimit, i dyshuari është arrestuar dhe është shoqëruar në stacion policor ku është intervistuar lidhur me rastin.
Me urdhër të prokurorit, ndaj 42-vjeçarit kanë nisur hetimet për veprën penale ‘Dhunë në familje’, ndërsa viktima ka shkuar te familja e saj.