Shoferi që dyshohet se shkaktoi aksidentin me fatalitet në lagjen e Bujupëve në fshatin Arllat të Drenasit, ku goditi për vdekje me veturë një 19-vjeçar, tashmë është arrestuar. Ai fillimisht ishte larguar nga vendi i ngjarjes, duke tentuar t’iu shpëtojë prangave të Policisë, por pas nisjes së hetimeve, i njëjti u identifikua dhe u prangos.
Burimet nga Prokuroria kanë bërë me dije se personi që po dyshohet për këtë rast është Xhemajl Kelmendi, i cili u dorëzua sot, pasi e kuptoi se Policia e kishte zbuluar përmes veturës së tij.
Pas intervistimit nga hetuesit policorë, Prokurori i Shtetit ka urdhëruar që i dyshuari të dërgohet në mbajtje për 48 orë dhe brenda afatit ligjor të ndërmerren veprimet e nevojshme ligjore.
Ndryshe, i riu që u godit për vdekje, Eduart Bujupi, u dërgua mbrëmë me urgjencë në spital, por nuk arriti t’iu mbijetojë plagëve të marra dhe vdiq mëngjesin e sotëm.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.