Kryeshefi ekzekutiv i Ngrohtores “Termokos”, Fisnik Osmani, ka zhvilluar një takim të rëndësishëm me përfaqësues të dy institucioneve të njohura ndërkombëtare – z. Moritz Remé, drejtor i KFW për Kosovë, dhe z. Sergiy Maslichenko, drejtor i EBRD për Kosovë.
Siç bënë të ditur kryshefi Osmani në facebook, takimi ka qenë i frytshëm dhe përmbajtësor, duke u përqendruar në projektet strategjike që synojnë tranzicionin e gjelbër në sektorin e energjisë termike për kryeqytetin.
“Mbështetja që po merr Termokos nga partnerët tanë strategjikë është një tregues i qartë se jemi në rrugën e duhur për të përmbushur objektivat tona,” ka deklaruar Osmani në postimin e tij.
Ai shtoi se menaxhmenti i ndërmarrjes publike po punon me përkushtim dhe transparencë për të garantuar standarde të larta në realizimin e projekteve që ndikojnë drejtpërdrejt në përmirësimin e cilësisë së ngrohjes për qytetarët e Prishtinës./Rajoni.org/
