Një ditë pasi Kryetari i Komunës së Prishtinës, Përparim Rama, tha se Ministri i Financave, Hekuran Murati, s’po e jep nënshkrimin për Unazën e Jashtme të Prishtinës, nënkryetari i kësaj komune, Alban Zogaj ka thënë se do të insistojnë që ta ndërtojnë këtë projekt.
Ai ka bërë me dije se ky projekt është futur si prioritet edhe në programin politik të LDK’së “Rruga e Re”.
Zogaj ka thënë se ky projekt do të jetë autostradë që e rrethon Prishtinën, dhe lidhet me hyrjet kryesore në kryeqytet dhe se e shkarkon kryeqytetin nga komunikacioni, raporton Express.
“Unaza e Jashtme e Prishtinës është projekt strategjik! Është autostradë që e rrethon Prishtinën, dhe lidhet me hyrjet kryesore në Kryeqytet. Pra, lidhet me hyrjen nga Gjilani, me hyrjen nga Fushe Kosova, me hyrjen nga Mitrovica dhe me hyrjen nga Podujeva! E shkarkon Kryeqytetin nga komunikacioni i panevojshem dhe krijon lidhje te reja me zonat industriale! Unaza e Jashtme e Prishtinës është projekt Nacional.
Ne do të insistojmë ta ndërtojmë këtë projekt, sepse fiton Prishtina, sepse fiton Kosova! Dhe, është futur si prioritet në Programin Politik të LDKsë ‘Rruga e Re’.”, ka shkruar Zogaj.
Ndryshe, Kryetari i Prishtinës, Përparim Rama tha se e kanë kryer dizejnimin e unazës së kryeqytetit.
Rama tha në Frontal në T7 se ky projekt 350 milionë eurosh i duhet Prishtinës dhe se tash e katër muaj po e presin një nënshkrim nga ministri i Financave, Hekuran Murati.
“E kemi përfundu dizajnin e unazës së kryeqytetit. Jemi në pritje të një nënshkrimi qe katër muaj prej ministrit të Financave për me leju me vazhdu në pjesën tjetër. Është një projekt madhor i kryeqytetit i cili është mëse i nevojshëm”, tha Rama.
“Na vyen një firmë e ministrit të Financave, për fat të keq. Nuk po e jep për momentin”, tha Rama.
I pyetur se pse Murati nuk po nënshkruan, Rama tha se “ministrit i duket shumë e madhe” paratë që parashihen të investohen.