Kryetari i Komunës së Drenasit dhe kandidati për një mandat të ri, Ramiz Lladrovci, ka reaguar ashpër ndaj përpjekjeve të kundërshtarëve politikë për të ndikuar në procesin zgjedhor, duke theksuar se qytetarët e Drenasit kanë besë dhe nuk mashtrohen lehtë.
Ai ka shtuar se fushatat që bazohen në premtime boshe nuk kanë vend në Drenas, duke ironizuar me kundërshtarët politikë: “Në fushata me numra të përkohshëm jepni premtime si babadimri, por sapo përfundojnë ato, vjen mesazhi ‘numri që keni kërkuar nuk ekziston’. Nuk e kam besuar se bini kaq poshtë, por ju e dini pse meritoni të jeni kaq poshtë.”
Postimi i plotë:
Qytetarët e Drenasit kanë besë Abelard!
Përpjekje të kota për ta ndalur fitoren “Për Drenasin Kampion”. Merrni frymë thellë e pini ujë të ftohtë, mashtrimet me poste e favore po marrin fund, 12 Tetori erdhi me 101 të mira.
Goditjet i kemi pritur, sepse ju njohim, në fushata me numra të përkohshëm jepni premtime si babadimri, posa përfundojnë ato, vjen mesazhi “numri që keni kërkuar nuk ekziston”. Nuk e kam besuar se bini kaq poshtë, por, ju e dini pse meritoni të jeni kaq poshtë.
Lista e asamblistëve për Kuvendin e Komunës “Për Drenasin Kampion”, përbëhet nga vajza e djem, gra e burra me integritet e dinjitet, me cilësi individuale e familjare, me vlera profesionale dhe atdhetare.
Qytetarët e zemrës së Kosovës as shiten, as blihen. Deri sonte, jam vënë në dijeni për tentimin e shtatë për të thyer asambliste e asamblistë, pa sukses.
Në kalanë e Drenasit, në bastionin kampion, nuk mund të grabitni, këtu ka rregulla edhe morale, edhe patriotike, edhe të besës.
101 arsye “Për Drenasin Kampion”, vazhdojmë edhe katër!
