Kuvendi i Kosovës i ka rrëzuar të gjitha propozimet për futjen në rend të ditës në seancën plenare të tetë projektligjeve të miratuara javën e kaluar në mbledhjen e Qeverisë së Kosovës, përfshirë atë për çmimet tavan, për banimin social e të tjerë.
Projektligjen u rrëzuan për shkak të mungesës së numrave të shumicës parlamentare, pasi për ndryshimin e rendit të ditës duhen 2/3-tat e votave të deputetëve prezentë në seancë.
Nga rreth 100 deputetë në sallë, mazhoranca numëronte rreth 60 vota, të pamjaftueshme për miratimin e propozimeve.
Shefja e Grupit Parlamentar të LVV-së, Arbërie Nagavci kërkoi mbështetjen e deputetëve për miratimin e tetë projektligjeve duke u thirrur në situatën urgjente në të cilën ndodhen institucionet.
Opozita e përbërë nga PDK, LDK dhe AAK arriti t’ia hedhë poshtë propozimet LVV-së duke arsyetuar se shqyrtimi i këtyre propozimeve nuk është çështje urgjente.
Vetëm Grupi Parlamentar Multietnik i dha mbështetje të gjitha projektligjeve.
