Sulmuesi serb i Fulham, Aleksandar Mitrovic është lojtari i radhës që i jep lamtumirën Europës për t’u transferuar në Arabinë Saudite. Klubet arabe duken të pandalshme në këtë merkato dhe është Al Hilal që pas Neymar e Milinkovic-Savic tashmë siguron edhe shërbimet e Mitrovic.
Klubi arab këmbënguli gjatë për shërbimet e 28-vjeçarit teksa Fulham do të përfitojë nga ky transferim 50 milionë paund, një shifër rekord kjo për klubin nga Londra. Megjithatë, pavarësisht parave, është trajneri i Fulham, Marco Silva ai i cili ka mbetur i zhgënjyer nga sjellja e Mitrovic.
Portugezi u shpreh se sulmuesi bëri gjithçka kishte në dorë për t’u larguar duke e braktisur skuadrën në fillimin e sezonit, një sjellje sipas tij jo shumë profesionale.
Megjithatë, edhe në këtë rast, paratë e arabëve duket se e bënë diferencën dhe Mitrovic do të nisë një aventurë të re në Lindjen e Mesme përkrah Neymar dhe shokut të kombëtares, Milinkovic-Savic.