Dhuna në familje po vazhdon të mbetet një ndër dukuritë më shqetësuese në vend, ku zakonisht viktima janë gratë të cilat dhunohen në forma të ndryshme kryesisht nga bashkëshortët e tyre, por edhe nga anëtarët e tjerë të familjes. Viktimat në shumë raste kërkojnë ndihmë dhe mbrojtje nga Policia, raporton Gazeta Sinjali.
Një rast i tillë ka ndodhur mbrëmë në një familje në rrugën ‘Xhafer Meta’ në Podujevë, ku një person dyshohet se ka ushtruar dhunë dhe e ka kërcënuar me jetë bashkëshorten e tij.
Burimet e Gazetës Sinjali brenda Prokurorisë kanë bërë me dije se 37-vjeçaja ka pësuar lëndime trupore dhe ka kërkuar ndihmë mjekësore në spital, ndërkohë që rastin e ka denoncuar në organet e rendit.
Bazuar në dëshminë e saj dhënë organeve të hetuesisë, gjithçka kishte filluar pas një konflikti me burrin e saj, i cili kishte përdorur forcë dhe e e kishte kërcënuar me thikë se do ta mbys. I dyshuari i kërkonte asaj që të largohet nga shtëpia dhe në një moment në ndihmë i ka dalë edhe vëllai i tij.
40-vjeçari dyshohet se ka sulmuar kunatën e tij, duke e shtyrë dhe duke rrëzuar nga shkallët e shtëpisë.
Si rezultat i denoncimit, njësitë policore kanë arrestuar dy vëllezërit dhe të dy janë shoqëruar në stacion policor, ku para hetuesve kanë mohuar të kenë ushtruar dhunë ndaj 37-vjeçares.
Prokurori i Shtetit ka urdhëruar inicimin e rastit ndaj të dyshuarve për veprat “Dhunë në familje” dhe ‘Lëndim i lehtë trupor’ dhe të njëjtit janë dërguar në mbajtje.