Mosmarrëveshjet për borxhe shpeshherë shkaktojnë incidente të ndryshme, të cilat eskalojnë në përleshje e kanosje serioze. Në të tilla raste jo rrallëherë përfshihen edhe punëtorët dhe pronarët e kompanive private, të cilët futen në sherr dhe përfundojnë në Polici, raporton Gazeta Sinjali.
Një rast i tillë ka ndodhur gjatë ditës së djeshme në fshatin Shupkovc të Mitrovicë, ku i dyshuar është një 29-vjeçar i cili është futur në konflikt me pronarin e kompanisë ndërtimore “Techno Burimi”, për shkak të borxhit.
Sipas informacioneve që ka Sinjali, i dyshuari B.T., ka thyer xhamat e këtij objekti, si dhe ka shkaktuar dëme të tjera, si pasojë e konfliktit që ka pasur me pronarin.
Përballë kësaj situate, dikush nga punëtorët e kësaj kompanie, e ka raportuar të dyshuarin në Polici, me ç’rast një njësi policore e ka arrestuar të njëjtin.
I riu është shoqëruar në stacion policor për intervistim dhe pas përfundimit të procedurave është dërguar në mbajtje për 48 orë. Me urdhër të Prokurorit të Shtetit, 29-vjeçari do të hetohet për veprën penale “Asgjësimi apo dëmtimi i pasurisë”.
Në anën tjetër, pronari i kësaj kompanie e ka mohuar rastin, duke thënë se nuk ka asgjë të vërtetë lidhur me këtë incident.