E shtunë, 20 Prill, 2024

Avullohen mbi 31 mijë euro në një qendër tregtare, shoqërohet në Polici menaxherja

Vjedhjet e shumta në biznese po shkaktojnë humbje të mëdha, por edhe pasiguri. Hajnat në shumicën e rasteve nuk kapen, pasi arrijnë të ikin pa u zbuluar. Një rast i ngjashëm ka ndodhur një qendër tregtare në Prizren, raporton Gazeta Sinjali.

Më shumë se 31 mijë euro janë ‘zhdukur’ nga kompania dhe kjo u vërejt gjatë barazimit të shumës së parave.

Burimet e Gazetës Sinjali brenda Prokurorisë kanë bërë me dije se stafi menaxhues ka deklaruar në Polici se ka muaj që kanë vërejtur parregullsi gjatë raportimeve, teksa kanë rënë në përfundim se shuma që mungon kap vlerën e mbi 31 mijë eurove.

Në kuadër të veprimeve hetimore, njësitë policore kanë marrë deklaratat e dy dëshmitarëve, të cilat kanë deklararuar se përgjegjësia e parave bie mbi menaxheren e pikës.

Si rezultat i denoncimit të rastit, menaxherja është shoqëruar në stacion policor ku është intervistuar lidhur me rastin.

Bazuar në dëshminë e saj dhënë organeve të hetuesisë, 30-vjeçarja që nga muaji dhjetor ka raportuar te menaxhmenti parregullsitë në pagesa, mirëpo sipas saj, ata nuk i kishin marrë parasysh.

Po ashtu ajo ka deklaruar se kompania i ka kërkuar asaj që të kompensojë shumën e parave që mungon dhe pas refuzimit të saj, rasti është denoncuar në organet e rendit.

Pas përfundimit të procedurave policore, Prokurori i Shtetit ka urdhëruar që rasti të iniciohet për veprën penale “Keqpërdorimi i autorizimeve ekonomike’, ndërsa veprimet tjera ligjore do merren varësisht nga zhvillimi i hetimeve.

Të fundit

Shija e redaktorit

- Advertisement -
 
//BODY PART STICKY - Implement into the footer