Një zyrtar policor dyshohet për rrahjen e një personi brenda një lokali në Mitrovicë të dielën.
Polici ishte jashtë detyrës zyrtare në kohën e incidentit, tha policia në raportin 24-orësh të hënën.
Rasti u denoncua në organet e rendit nga ankuesi.
Por, njësitet policore pas daljes në vendin e ngjarjes dhe bazuar në video-incizimet nga kamerat e sigurisë panë se ankuesi e kishte kanosur me thikë oficerin policor.
“Ankuesi mashkull kosovar ka raportuar se në një lokal është sulmuar fizikisht nga një zyrtar policor i PK-së (jashtë detyrës zyrtare), i cili pastaj është larguar nga vendi i ngjarjes”, thuhet në raport.
“Njësitet policore kanë dalë në vendin e ngjarjes dhe bazuar në video incizime shihet se ankuesi kishte një mjet të mprehtë-thikë me të cilën dyshohet se ishte duke e kanosur zyrtarin”, tha policia.
Njësitet policore kanë konfiskuar mjetin-thikën, ndërsa lidhur me rasti është informuar edhe prokurori dhe Inspektorati Policor i Kosovës.
