Një person ka humbur jetën pasi u godit për vdekje nga një veturë që po lëvizte në rrugën nacionale Prishtinë – Pejë, saktësisht në fshatin Sllatinë, raporton Gazeta Sinjali.
Lajmin e ka konfirmuar zëdhënësi i Policisë së Kosovës, Bajram Krasniqi, i cili ka bërë me dije se vdekjen e këmbësorit e ka konstatuar mjeku që doli bashkë me ekipin mjekësor të Emergjencës në vendin e ngjarjes.
“Rreth orës 20:35, policia është njoftuar për një aksident trafiku të ndodhur në rrugën nacionale Prishtinë-Pejë (fshati Sllatinë). Në aksident është përfshirë një veturë nga e cila është aksidentuar një këmbësor”.
“Njësitet policore kanë dalë në vendin e ngjarjes, po ashtu edhe ekipi mjekësor të cilët kanë konstatuar se këmbësori është pa shenja jete”, ka thënë zëdhënësi i policisë, Bajram Krasniqi.
Po ashtu, ai ka bërë të ditur se drejtuesi i automjetit është shoqëruar në polici për të vazhduar me procedurat e parapara për raste të tilla.