Mosmarrëveshjet mes çifteve ndodhin për çështje të ndryshme e që shpeshherë ato eskalojnë në zënka të cilat përfundojnë duke u dashur ndërmjetësimi i personave të tretë, apo edhe Policisë. Një vajzë e re nga Komorani, së fundi ka denoncuar në Polici të fejuarin e saj, raporton Gazeta Sinjali.
Pakënaqësitë e saj dyshohet të lidhen me vendin se ku ata do të jetojnë, gjë e cila ka bërë që mes tyre të ketë konflikt.
Burimet e Gazetës Sinjali brenda Prokurorisë kanë bërë me dije se 22-vjeçarja ka kërkuar nga i fejuari i saj që të largohen nga shtëpia dhe të jetojnë diku tjetër, mirëpo këtë nuk e ka lejuar ky i fundit.
Si rezultat i denoncimit, 20-vjeçari është shoqëruar në stacion policor ku është intervistuar lidhur me ngjarjen.
Me urdhër të prokurorit ai do të hetohet në liri për veprën penale ‘Dhunë në familje’.