E martë, 23 Prill, 2024

Burri shkel urdhrin mbrojtës, e kërcënon gruan me jetë: “Kam me iu vra”

Urdhrat që lëshojnë Gjykatat ndaj personave të cilët kanë kryer dhunë në familje jo gjithmonë respektohen dhe për pasojë vepra përsëritet e madje përfundon edhe tragjikisht, siç ndodhi me rastin e gruas shtatzënë që u vra nga ish-bashkëshorti i saj. Një rast i frikshëm, ku është paralajmëruar edhe vrasja ka ndodhur së fundmi në një familje në Prizren, raporton Gazeta Sinjali.

Burimet nga Prokuroria kanë bërë me dije se një grua e ka denoncuar bashkëshortin e saj në Polici, i cili nuk e ka respektuar urdhrin mbrojtës të Gjykatës, ashtu që e ka kanosur seriozisht, në shtëpinë e tyre, në rrugën “Ismet Gashi”.

Sinjali mëson se i dyshuari N.C., e ka kërcënuar viktimën se do ta largojë nga shtëpia dhe e ka paralajmëruar se do ta pësojë tragjikisht, duke i thënë se “kam me iu vra”.

Përballë kësaj situate, gruaja ka vendosur ta raportojë rastin në Polici, ku ka kërkuar mbrojtje pasi ka frikë se mund të ndodhë diçka e keqe.

Si rezultat i denoncimit, Policia e ka arrestuar të dyshuarin, i cili para hetuesve policorë ka dhënë një deklaratë për rastin, duke e mohuar ta ketë kanosur gruan dhe më pas është dërguar në mbajtje për 48 orë.

Ndryshe, masa mbrojtëse e ndalimit të afrimit viktimës së dhunës në familje si dhe vartësit të tij/saj dhe personave tjerë nëse është e nevojshme, mund t’i shqiptohet personit i cili ka kryer dhunë në familje, nëse ekziston rreziku i përsëritjes së dhunës në familje.

Në urdhrin me të cilin shqiptohet masa e ndalimit të afrimit viktimës së dhunës në familje, gjykata cakton vendin, regjionin dhe largësinë, brenda së cilës kryerësi nuk guxon t’i afrohet viktimës së dhunës në familje.

Të fundit

Shija e redaktorit

- Advertisement -
 
//BODY PART STICKY - Implement into the footer